Tokyo er yndisleg yrjótt læða í heimilisleit. Hún er talin um tveggja ára gömul vergangskisa sem fannst í iðnaðarhverfi á höfuðborgarsvæðinu. Tokyo er yfirmáta kelin og mannelsk og malar hátt og mikið þegar hún fær athygli. Hún elskar að leika og er afar forvitin og kraftmikil. Það þyrfti að gæta vel að því að halda henni inni fyrst um sinn á nýju heimili. 

Tokyo er alger drottning og lyndir ekki við aðra ketti og þarf að vera eina kisan á heimili. Það hefur ekki reynt á hana með börnum en eins mannelsk og hún er þá ætti hún að vera í góðu lagi með eldri börnum sem koma fram við hana af tilhlýðilegri virðingu. Tokyo er geld, örmerkt og bólusett og tilbúin á ábyrgðarfullt heimili þar sem hún fengi næga athygli og þolinmæði meðan hún aðlagast.