Katla er ljúfur kisi sem hefur komið sér vel fyrir á fóstur heimilinu sínu. Þar býr hún með tveimur öðrum köttum og öllum semur mjög vel. Hún er afskaplega hlý og eltir fóstur mömmu sína á milli herbergja. Hún er ný byrjuð að þyggja almennilegt kúr og klapp, núna veit hún ekki um neitt betra.

Það er enþá leikur í elskunni og hún er mikill aðdáandi kattarnippu. Hún er dugleg að drekka ferskt vatn í skál og borðar full mikið ef hún kemst upp með það. Það er hægt að fá hana næstum hvert sem er ef það er nammi á næstu grösum og stöku sinnum heyrist hátt og skýrt mjálm frá henni þegar hún fær matinn sinn.

Þessi elska þarf aðstoð við að klippa neglurnar á afturlöppunum sínum og þarf reglulega að greiða henni. Hún kom okkur fljótlega á óvart þegar hún þáði klapp frá barni (yfir 10 ára). Hún kippir sér ekki upp við tónlist né hljóð frá heimilistækjum þó metum við svo að hún myndi blómstra á heimili í rólegri kantinum. Hún er alltaf mætt inn í eldhús sem aðstoðarkokkur og gæða-eftirlit, slær ekki loppunni á móti allskyns matarlykt og hefur gaman að því að fylgjast með í eldhúsi, lífi og leik.